ನಾವೀಗ ಹೇಳಹೊರಟಿರೋದು ಸಹ ಸಾಮಾನ್ಯರಂತಿರುವ ಅಸಾಮಾನ್ಯ ಮಹಿಳೆಯೊಬ್ಬರ ಬಗ್ಗೆ. ಹಾವೇರಿ ಜಿಲ್ಲೆಯ ರಾಣೆಬೆನ್ನೂರು ತಾಲ್ಲೂಕಿನ, ಚಿಕ್ಕಕುರವತ್ತಿ ಗ್ರಾಮ ಪಂಚಾಯಿತಿ ವ್ಯಾಪಿಗೆ ಸೇರಿದ ಚೌಡಯ್ಯದಾಸನಪುರದಲ್ಲಿ ಮಹಿಳೆಯೊಬ್ಬರು ನೀರುಗಂಟಿಯಾಗಿ ಕಾರ್ಯ ನಿರ್ವಹಿಸುತ್ತಿದ್ದಾರೆ. ಆಕೆಯ ಹೆಸರು ಪುಷ್ಪಾವತಿ ಸೋಮಪ್ಪ ಹೊನ್ನತ್ತಿ ಅಂತ. 2000ನೇ ಇಸವಿಯಲ್ಲಿ ಈಕೆಯ ಪತಿ ಸೋಮಪ್ಪ ಹೊನ್ನತ್ತಿ ನೀರುಗಂಟಿ ಕೆಲಸಕ್ಕೆ ಸೇರಿದ್ರು. ಬಳಿಕ 2007ರಲ್ಲಿ ತಮ್ಮದೇ ಗ್ರಾಮದ ಪುಷ್ಪಾವತಿ ಎಂಬಾಕೆಯನ್ನು ವರಿಸಿದ್ರು. ಮದುವೆಯಾದ ಮೂರು ವರ್ಷಗಳ ಬಳಿಕ ಗ್ರಾಮದಲ್ಲಿನ ಬೀದಿ ದೀಪವನ್ನು ಸರಿಪಡಿಸಲು ಹೋದ ಸೋಮಪ್ಪ ಲೈಟ್ ಕಂಬದಿಂದ ಬಿದ್ದ ಕಾರಣ ಸಂಪೂರ್ಣ ಸ್ವಾಧೀನ ಕಳೆದುಕೊಂಡರು. ಅಷ್ಟರಲ್ಲಾಗಲೇ ಈ ದಂಪತಿಗೆ 10 ತಿಂಗಳ ಗಂಡುಮಗುವಿದ್ದ ಕಾರಣ, ಕುಟುಂಬದ ಆಧಾರಸ್ತಂಭವಾಗಿದ್ದ ಸೋಮಪ್ಪನಿಗೆ ಹೀಗಾಗಿದ್ದು ಇಡೀ ಕುಟುಂಬವನ್ನು ಕತ್ತಲಿಗೆ ದೂಡಿದಂತಾಗಿತ್ತು.

ಆದರೂ ಧೃತಿಗೆಡದ ಪುಷ್ಪಾವತಿ ತನ್ನ ಗಂಡನನ್ನು ಆರೈಕೆ ಮಾಡಿ ಉಳಿಸಿಕೊಂಡರು. ಜೀವವೇನೋ ಉಳಿಯಿತು ಆದರೂ ತನ್ನ ಪತಿ ಮೊದಲಿನಂತಾಗಲಿಲ್ಲ ಎಂಬ ಕೊರಗು ಆಕೆಯನ್ನು ಕಾಡತೊಡಗಿತು. ಇದರ ಮಧ್ಯೆಯೇ ಮನೆಯ ಆರ್ಥಿಕ ಪರಿಸ್ಥಿತಿಯೂ ತೀರಾ ಹದಗೆಡಲಾರಂಭಿಸಿತು. ಇಷ್ಟರಲ್ಲಾಗಲೇ ಗ್ರಾಮ ಪಂಚಾಯಿತಿಯವರು ನೀರುಗಂಟಿ ಕೆಲಸಕ್ಕೆ ಬೇರೆಯವರನ್ನು ನೇಮಿಸಿಕೊಳ್ಳಬೇಕೆಂಬ ನಿರ್ಣಯಕ್ಕೆ ಬಂದಿದ್ದರು. ಈ ವಿಷಯವನ್ನು ತಿಳಿದ ಪುಷ್ಪಾವತಿ ಗ್ರಾಮ ಪಂಚಾಯಿತಿಗೆ ಹೋಗಿ ನೀರುಗಂಟಿ ಕೆಲಸವನ್ನು ತನ್ನ ಗಂಡನಿಗೇ ನೀಡುವಂತೆ ಮನವಿ ಮಾಡಿಕೊಂಡ ಪರಿಣಾಮ, ನೀರುಗಂಟಿ ಕೆಲಸ ಇವರಿಗೇ ಉಳಿಯಿತು. ಕಾಲಿನ ಸ್ವಾಧೀನ ಕಳೆದುಕೊಂಡಿದ್ದ ತನ್ನ ಗಂಡನನ್ನು ವೀಲ್‌ಚೇರ್‌ನಲ್ಲಿ ಕೂರಿಸಿಕೊಂಡು ಈಕೆಯೂ ನೀರುಗಂಟಿ ಕೆಲಸ ಆರಂಭಿಸಿದರು. ಈಕೆಯ ಬಾವ(ಗಂಡನ ಅಣ್ಣ) ಪಕ್ಕದ ಗ್ರಾಮದಲ್ಲಿ ನೀರುಗಂಟಿಯಾಗಿ ಕೆಲಸ ಮಾಡುತ್ತಿದ್ದರಿಂದ ಅವರ ಸಹಾಯ ಪಡೆದು ಪುಷ್ಪಾವತಿ ತಮ್ಮ ಗ್ರಾಮದಲ್ಲಿನ ನೀರುಗಂಟಿ ಕೆಲಸವನ್ನು ಸಮರ್ಥವಾಗಿ ನಿಭಾಯಿಸಲಾರಂಭಿಸಿದರು. ಹೀಗೆ ಕುಂಟುತ್ತಾ ಜೀವನ ನಡೆಯುತ್ತಿರುವಾಗಲೇ 2019ರಲ್ಲಿ ಪುಷ್ಪಾವತಿ ಗಂಡ ಸೋಮಪ್ಪ ಕೊನೆಯುಸಿರೆಳೆದರು. ಅಷ್ಟರಲ್ಲಾಗಲೇ ನೀರುಗಂಟಿ ಕೆಲಸವನ್ನು ಕರಗತ ಮಾಡಿಕೊಂಡಿದ್ದ ಪುಷ್ಟ ಗ್ರಾಮ ಪಂಚಾಯಿತಿಯವರ ಬಳಿ ಮನವಿ ಮಾಡಿ ನೀರುಗಂಟಿ ಕೆಲಸವನ್ನು ತನಗೇ ಕೊಡುವಂತೆ ಮನವಿ ಮಾಡಿಕೊಂಡ ಪರಿಣಾಮ ನೀರುಗಂಟಿ ಕೆಲಸವನ್ನು ಈಕೆಗೇ ನೀಡಲಾಯಿತು. ಕಳೆದ ಆರೇಳು ವರ್ಷಗಳಿಂದ ಬೇಗ ಎದ್ದು ಗ್ರಾಮದ ಓಣಿಗಳಿಗೆ ನಿಗದಿತ ಅವಧಿಗಳಲ್ಲಿ ನೀರನ್ನು ಬಿಡುವ ಜೊತೆಗೆ ಗ್ರಾಮದಲ್ಲಿರುವ Over Head Tank ಗೆ ಕೂಡ ಕರೆಂಟ್ ಇದ್ದ ಸಮಯವನ್ನು ನೋಡಿಕೊಂಡು ನೀರು ತುಂಬಿಸುತ್ತಾರೆ. ನೀರು ಸರಬರಾಜಿನ ಜೊತೆಗೆ ಗ್ರಾಮ ಪಂಚಾಯಿತಿಯಿಂದ ಆಗಿಂದಾಗ್ಗೆ ವಹಿಸಲಾಗುವ ಎಲ್ಲಾ ಕೆಲಸಗಳನ್ನು ಸಮರ್ಥವಾಗಿ ಮಾಡಿಕೊಂಡು ಬರುತ್ತಿರುವ ಪುಷ್ಪಾವತಿ “ಇದೇನು ನನಗೆ ಕಷ್ಟದ ಕೆಲಸ ಅಲ್ಲ. ನನ್ನ ಗಂಡನಿದ್ದಾಗ ಅವರ ಜೊತೆ 11 ವರ್ಷ ಇದೇ ಕೆಲಸ ಮಾಡಿದ್ದೇನೆ. ನಾನು ಈ ಕೆಲಸದಲ್ಲಿದ್ದುಕೊಂಡು ಸಾಕಷ್ಟು ಕಲಿತಿದ್ದೇನೆ ಎನ್ನುತ್ತಾರೆ”.

ಇದೀಗ ದೇಶಾದ್ಯಂತ ಜಲ ಜೀವನ್ ಮಿಷನ್ ಯೋಜನೆ ಜಾರಿಯಲ್ಲಿದ್ದು ಈ ಗ್ರಾಮ ಪಂಚಾಯಿತಿ ವತಿಯಿಂದ ನೀಡಲಾಗುವ ಕೌಶಲ್ಯ ತರಬೇತಿಯಲ್ಲೂ ಭಾಗಿಯಾಗಿರುವ ಪುಷ್ಪಾವತಿ ನೀರಿನ ಗುಣಮಟ್ಟದ ಪರೀಕ್ಷೆ ಸೇರಿದಂತೆ ಆಧಾರ್ ಕಾರ್ಡ್ಗಳನ್ನು ಸಂಗ್ರಹಿಸುವುದು. ಸಮುದಾಯ ವಂತಿಗೆ ಸಂಗ್ರಹಿಸುವಲ್ಲಿ ಸಹಕರಿಸುವುದು ಹೀಗೆ ಹಲವು ಕೆಲಸಗಳನ್ನು ಸಮರ್ಥವಾಗಿ ನಿಭಾಯಿಸುತ್ತಿದ್ದಾರೆ. ಇವರಿಗೆ ನಮ್ಮದೊಂದು ಸಲಾಂ.